Cawet

Cerita Ringkes Olih Ni Nengah Budawati, Foto Ilustrasi oleh Luh De Suriyani

Telung tiban sube I Gede Darmika metunangan ngajak Ni Luh Swandewi, meme bapane ngrencanaang lakar nyangkepang pianakne enggal. Apang sing enggalan ade gegodan bin mani puan, sawireh ajak dadua sube pade suud kuliah, sube pade bisnis masih. Buine nyen sing nawang I Gede, anak bagus, jemet, tur sugih. Patuh masih Luh, anak jegeg, tur solahne adung teken kejegeggane, keto masih ye sugih, nyen anak muani ane tusing demen teken ukudane.

Ambyug orta dirurunge upakara mapragate lakar gede, bale banjar sube bookinge, yen anak tusing sugih, kanggoange sube di natah pekarangane dogen ngae upakara.

“Buk Gede anak mule ngelah, kude kaden lakar mepenge pipis anggon biaya upakara tenenan,” keto men Sukadi ipah Buk Gede kelihan, ngrimik.

“Eh….nak orahange mani peteng lakar ade konser gratis lagu pop bali, to… ape group I Gede lakar nyumbang lagu,” keto men Sukarta sade agem sawireh ye mule abehne paling nyentrik di desane , gayane sube care artis sing kesampaian, meh…meh mani peteng ye milu nagih magending sawireh mentalne gede sajan.

“Ije ye I Gede ajak Luh mafoto gede buke keto, gedenan teken tivi I cange jumah, bin sade penganggone ngrenyeb aengan teken pengangga raja jaman ilu,” keto men Soken ngrenggeng sambilange nalinin jaje bantale.

Makejang saja pade anggob, meh…orta di tongos anake matulungan mebat  aengan buin. Yen nyak, Pak Gede ngae gae di Hotel berbintang sinah ngidang, Pak Gede mula warga sukses di rantauan.

Uling ije kaden tekane, embok Darmi maid liman tiange sade nyebeng, krame ane lenan pada kisi-kisi ningalin tingkah embokne I Gede buke keto, ajake tiang ke paon apang johan teken krame ane matulungan.

Tiang bingung, ”aduh …de, lacur sajan jani men Mantra anak jleme sing nawang lek, ape nyelapang  ape tusing, ye ngabe cawet, cawetne nyemplung di ember tongos pengumbahan prabote, liu anak nepukin, kenken ne?” munyine care mimis sing kepegatang, bangras nyetang sube gedeg sajan.

”Anak kenken kaden masan kene ngabe tingkah ane soleh-soleh,“ ngelantur ye mamunyi.

Tiang sing pesu munyi nang a besik, nadak sare sirah tiange pengeng, tumben jani ade anak ngabe cawet matulungan, setahu jatma, cawet ento benda rahasia paling silib, sing dadi edengan, tongosne setate di teben. Nyemuh dogen anake lakar ngalih tongos ane silib apang tusing yen ade tamui, lek saget tepukine. Kaling ke anak len, somah padidi yen be masalah urusan pengangga dalam anak tusing juari. Yen kal tawang lakar matulungan to ngudiang abe, sing dadi meken manjus ke danune mulih malu jemak, aduh……..

Keluarga makejang sing ngidang bes nyangetang unduke ento sawireh Men Mantra ade hubungan ipah teken Buk Gede, adine Buk Gede masomahan ajak Men Mantra. Unduke ento mule dadi kenehan makejang krame desane, pokokne tusing maan jawaban ngae pegeng dogen.

Petengne tiang meled masih matakon ken embok Darmi, tingalin tiang ye sube tenangan a bedik “Embok kenken unduke adi cawet men Mantra bisa ulung, nak dije kejang?“ sade adeng munyin tiange apang tusing dingehe teken muani-muanine ane meceki.

“Di anduke ane lakar abane manjus, selete di bangkiangne, sangkel embok sangsi ngudiang matulungan tengai tepet, barang ento sube abe, kaden yen manjus nyaluk sanje,“ cawet orahange barang, meh…ngeng embok Darmi ngadanin, mule soleh dingehe ken kupingnge.

Ortane ane uling a bulan di desane nyambatang indik keanggoban karya mapragatan I Gede teken Luh Swandewi, mesalin akijapan mata teken satua cawet Men Mantra ane nyemplung di pangumbahan prabote.

Suud unduke ento Luh setate nyele ati, dugase mebakti ke Bale Agung mapayas sube sekadi raja lan ratu, kewala sengkala, ye pingsan sing ade angin sing ade ujan. Makejang acarane ane kasusun rapi dadi rambug, payu acara mapragatane dadi acara ngurus anak gelem sing tawang sakitne. Dokter puskesmas di desan tiange sibuk ngurus Luh. Ane paling nyebetang keneh tamiu liu teke sakewale pengantene sing ngidang nyambut, ane nyambut payu reramane make dadua, nyen ane nganten, panakne ape reramane. Brayane makejang pada pakrimik apeke sakitne Luh, ada hubungane teken cawet ento.

Acara konser lagu pop Baline batal, makejang ngrenggeng, kramane tusing payu maan hiburan gratis, sing karoan telung tiban cepok ade hiburan peh… kene penadine.

Dadong tiange ane masih dadong I Gede, tiang mule mamisan ajak Gede, ngeling sigsigan sawireh nepuk cucune kene sengkala buke keto, keneh tiange dadi engsek.

”De, da orahanga nah!…. Bapakne Gede anak mamitra ajak Men Mantra,“ I dadong nyangetang ngeling sambilange maseselan.

Rasa makecos batu matan tiange ningeh unduke buke keto, beh… care sesonggane, ipah ipuh, mehan kenehne nganggo panangkeb apang makejang keluargan Pak Putu jerih teken ye.

(Penulis cerita ringkes, Ketua LBH APIK Bali)