I Barak

Cerita Ringkes olih Nengah Budawati, Ilustrasi Blog Baliwww

Ketekokan siap ane sewai-wai piaranA teken I bapa sabilang semengan mangunin tiang ajak makejang. Ane ngeranaang tiang cemburu ajak siape boya ja sangkaning sadina-dina baange ngamah pepek, sakewala lebihan ia runguangA teken Bapan tiange. Magecel sabilang sanja, manjus nganggon yeh anget, beh, sayang Bapan tiang sing kadi-kadi ajak I Barak, to adan siap ane kaubuh teken Bapan tiange.

Yen I bapa lakar pesu setata pabesenne a besik dogen “ De ingetang maang siape ngamah, celepang yen lakar ujan, ingetang nyen !”, misi maimbuh, “ ingetang nyen!”, artinne tiang sing dadi engsap.

“ Nyen engsap lacur “, keto tiang nyambat di keneh.

Kenapa tiang nyambatang lacur, sawireh taen tiang kasep nyelepang I Barak sawireh tiang kadung girang malayangan di lapangan dauh umahe ajak timpal-timpale, nadak sare ujanne bales ngrudug, tiang bicuh narik layanganne, mupulin benangne, apang tusing pegat sawireh merasa tiang, layangan gae padidi mesuang peluh. I Barak ujan licitan, beh, panik rasaang tiang sing buungan tiang kena opakan I Bapa. Sing kuangan akal tiang, lapin tiang I Barak, asin-asin tiang ia apang tusing ngrebek rengas, bayun tiange runtag takut I Bapa enggalan teka. Sakewala di keneh tiange pedih sing kodag baan, sawireh ulian I Barak tiang ngemasin sai-sai kena uyut.

Ane ngeranaang I Barak sayanganga pesan teken I Bapa sawireh I Barak pepesan menang aduna di branangane. Sakewala tiang eran, jawet menang I Bapa, jawet kalah, idup tiange sing taen berubah tuah amonian dogen. I Meme tileh bicuh ngalih gae medagang kapeken nendak be jair, luas uli konden ngedas lemah, uyak ujan, uyak ai. Ditekane kategale mapamulan, misi ngubuh sampi buin. Tiang teka uli masuk masih milu nulungin ngarit ajak embok Luh Sri. Medaar sederhana dogen, makita masih tiang yen I Bapa menang  tiang belianga baju baru, belianga layangan ane melahan apang ade anggon tiang makorot ajak timpal-timpale.

Yen nuju I Barak menang angob tiang ningalin I Bapa bangga teken I Barak, sabilang ada pisaga teka melali mulih setata I Barak ane kesambat. Len ajak dugase tiang maan juara, I Bapa biasa-biasa dogen.

“Pak Gede buin I Barak menang ibi, mula ia siap ane hebat, beh timpal-timpale ane ngetohin ia makejang demen menang liu, mula sing rugi tiang ngecel sabilang sanja!” keto raosne bangga.

“Kenken Pan Sri suba tawah aji liu ngude sing adep dogen beliang ane baru, Pan Sri kan asi manian suba patuh cara I Barak ,“ keto Pak Gede nyambat sambilanga ngrayu I Bapa mirib utusan Pak Ngurah ane nagih meli I Barak.

“Ah, tusing kal adep, baang ia kanti tuwe ubuh tiang, tiang suba kadung sayang, tingalin to Pak Gede, I Barak mula gagah Sajan!” keto abetne sambilanga makadadua ningalin I Barak sing makedipan.

Inget tiang dugase ento nu semengan I Bapa suba ngidupang mesin motor, kapupungan tiang bangun ajak embok tiange, I Barak konden makruyuk mangunin tiang. Biasane I Bapa bangun tengai tiang lakar majalan masuk, I Bapa nu ngeris pules masaput gebyog.

Matakon tiang di keneh, “ Lakar kija I Bapa semengan buka kene?”.

Konden suud tiang makeneh-keneh I Bapa nyambat sambilanga nyelepang I Barak ka kisane, “ Bapa lakar matajen ka Tajun, lamun I Meme teka orahang buka keto ,“ keto abetne sambilanga menek ka motor buntutne.

Tiang nu negak bengong ajak embok tiange, ilang kiyap tiange sambilang ngantiang semengan tiang ajak dadua ngidu ngilangang gesit.

Tengaine mara suud pelajaran ketiga I Meme ngalih tiang kesekolah, Wali kelas tiange nyambat, “ Made alihe teen I Meme, silakan boleh pulang,” punika raosne.

Bingung tiang ada apa, tiang tusing nawang, “ Ada apa Me, ngudiang ngalih tiang kasekolah?” keto petakon tiange, tingalin tiang muan I Meme cara anak panik.

“ Mai mulih malu nyanan neked jumah nyatua!” keto abet I Meme sambilanga majalan gencang, tiang ajak embok nutugin.

“ Nah, dengokin dogen ia, lan mejalan!” keto abetne Pak Gede mara tiang neked di natah umahe.

“ Lacur!” keto tiang nyambat di keneh, sinah I Bapa jemak Polisi sawireh jani Polisi gencar nangkep bebotoh, apa buin bebotoh cara I Bapa ane terang-terangan suba mebukti, judi togel dogen ane mengkeb-mengkeb liu masuk bui. Lek, kenken timpal tiange nyambatang I Bapa penjara ulian mamotoh. Makelo tiang lakar tusing ajak I Bapa, diapin I Bapa tusing taen rungu ajak tiang nu masih luungan sabilang sanja  ngidang tiang matepuk, sedek I Bapa ngecel I Barak. Di jalan I Meme tingalin tiang ngeling dogen, mirib kenehne sebetan teken tiang, keto masih embok, Pak Gede masih iteh nyetir  makejang siep, tiang masih milu mendep.

Paling liat tiange, sawireh, Pak Gede tusing ngajak tiang ke Kantor Polisi, sakewala ke Rumah Sakit Bangli. Negak tiang di ruang tunggu di muka ane ada tulisan UGD. Ngetor batis tiange mirib I Bapa kene Taji, Dokter pasliwer, perawat masih pasliwer, anake nengokin pasien masih pasliwer.

I Barak kruyuk-kruyuk sedek tiang bengong mirib nawang tiang ane teka, megantung ia di stang montor buntut I Bapa, sedek tiang ningalin I Barak teka Pak Suar.

“ De, Bapak ngaba mai motor I Bapa ajak I Barak, Bapan De be sing ngidang ngaba motor,” keto abetne sambilanga nyiup roko.

Gerong-gerong I Meme ngeling sambilange nyambat “ Made, tusing jani ngelah Bapa!”.

Mendep tiang sing ngidang mamunyi.

A Bulan suba liwat I Bapa ngalahin tiang ajak makejang, I Barak nu seger ubuh tiang patuh baan tiang ngerawat cara I Bapa.

“ De, baang ba Pak ngurah meli I Barak, amen De iseng dadi dengokin keme!” keto Pak Gede nyambat sedek tiang maang ngamah I Barak.

Baang tiang I Meme ngadep I Barak, diastun ia kesayangan I Bapa, takut tiang buin manian bisa lakar dadi bebotoh ulian suba kadung demen ngecel sabilang sanja, pipis ane baan ngadep I Barak lakar anggon tiang biaya masekolah.

“ De, kenken kabare?, I Barak suba nyangsan tuwe!” keto Pak ngurah nyalamin tiang dugas matepuk di penelokan sedek tiang lakar nyumu masuk SMP, suba atiban tiang sing matepuk ajak I Barak.

“ Beh, kaden tiang suba mati ia kalah, nu idup ia Pak?” keto tiang matakon lega.

“ Nu, mula ubuh Bapak ia sawireh inget Bapak ajak Bapan De, ane taen nyambat apin bebotoh makita masih ngelah pianak terus masuk apang tusing cara ragane bebotoh, selegang masuk!, ada apa-apa De dadi ngalih Bapak, Bapak suud masih mamotoh ulian nepukin Bapak De, buka keto!,” keto abetne sambilanga mecelup ke mobilne tur mejalan. [b]

Ilustrasi Blog Baliwww.